濕氣一直都係攝影器材嘅大敵，長期處於潮濕環境嘅話，器材有極大機會發霉🤢新手唔知道應該點樣防潮？今日就介紹三種常見方法俾大家！
[1️⃣最理想：電子防潮箱📺]
顧名思義，電子防潮箱就係一種能夠自動監察並調節濕度嘅產品，放曬啲相機、鏡頭入去，再揀好濕度範圍，防潮箱就會自動抽濕。
佢嘅👍優點係：可以精準控制環境濕度，確保唔會過濕/過乾；而且唔需要頻密更換抽濕耗材。
👎缺點就係：售價相對較昂貴，售價約$700起；而且要keep住用電，所以買嗰陣記得睇清楚耗電量呀⚡
[2️⃣可接受：密封式防潮膠箱]
本質上佢就係一個膠箱😂但就加咗氣密封邊，嚟到隔絕濕氣；再喺箱內放置抽濕物品嚟控制濕度。
佢嘅👍優點係：售價比較親民，最平$2~300都買到；而且隔絕濕氣嘅效果比一般櫃桶/膠箱好。
👎缺點就係：要定期更換箱內防潮物品，否則同樣有機會令器材發霉。
[3️⃣有風險：櫃桶加防潮珠]
如果位置同預算都好有限嘅話，可以試下最最最土炮嘅方法：喺放攝影器材嘅櫃桶入面放防潮珠🐘嘗試稍微降低濕度。
佢嘅👍優點係：售價最親民，幾十蚊就搞得掂。
👎缺點就係：要定期更換箱內防潮物品；以及未必可以有效隔絕外在濕氣。
店主自己就試過有鏡頭係用3️⃣嘅方法嚟保存，最後都係輕微發霉💀所以依個並唔係最有效嘅方法，如果條件許可嘅話，都係電子防潮箱最放心👍
| 常見問題1️⃣ | 鏡頭發霉有咩影響？
除咗影響觀感之外，霉菌範圍太大嘅話，成像嘅對比度可能會低咗，甚至有古怪斑印🧬；長遠亦有機會侵蝕鏡頭鍍膜，造成無可挽救嘅傷害🙅
| 常見問題2️⃣ | 可唔可以自己清霉菌？
Youtube有好多片教大家點樣拆卸及清潔鏡頭組件🪚，但店主就唔太建議大家咁做，一來因為鏡頭內部結構十分複雜⛓， 部分位置需要用到專業工具先至拆解得到 ，新手未必搞得掂； 二來如果用咗不當化學物品清潔鏡頭嘅話☣，亦都有機會傷害到鏡片，所以最好都係交返俾有經驗嘅師傅處理好啲🪛
| 常見問題3️⃣ | 機身洗唔洗放防潮箱？
菲林相機嚟講，霉菌一般都會出現喺：鏡頭內外、機身反光鏡、以及觀景窗附近等三個位置。如果有空間嘅話，當然最好就係機身同鏡頭都放埋入去防潮箱喇💧。
香港環境長期都非常潮濕，極度容易引致霉菌滋生；所以如果大家仲未有防潮箱嘅話，記得做好相應嘅防潮措施，否則等鏡頭真係發霉先嚟後悔就太遲喇💀
By #idiotCamera
Comentários